شكون أنا ؟


شكون أنا ؟
هانية الشرامي

إلى شفتيني
بلى ما تسقسي عليا
غير من شوفتك ليا
تعرفني عبدية
بنت عبدي
او عبدية
ربا وني والديا،
على الأخلاق
وحسن النية.
ما نعادي ناس
و لكبير فيهم
ما نهز فيه عينيا.
تربيت و عشت في بلادي
وبغيت من بعد نربي فيها ولادي.
يعشقوا ما عشقت آمهم
عشقت الأحياء الشعبية
والواني الطينية،
ومانساوش الحوتة الطرية
في الشواية مشوية.
يعشقوا ما عشقت في بلادها
طاجينها لي ما ليه مثيل،
في شكلو كبير و جميل،
لي قرا و سمع عليه
ما تبرد نارو
حتى يجي ليه.
سوا كان مغربي و لا سايح
المهم هو ليه جاي رايح
عينو..
عشقات جمالو
لي ما لقات في العالم بحالو.
يعشقوا ما عشقت في بلادها
الخيول المسرجة
و العيطة الحرة الأصيلة.
إلى شفتيني
بلا ما تسقسي عليا
غير من شوفتك ليا
تعرفني عبدية
جدوري عبدية
أغصاني مسفوية،
مسفوية حرة
بنت الأصل
مربية أحسن تربية
أنا بعيدة على كل ما قالوا عليا،
هداك الشي
كاين هنا و لهيه
و حتى واحد ما يخفى عليه،
كل واحد يبقى في همو
و للي فيه يكفيه.
أنا مسفوية،
بالرزانة و الحداكة،
تسمع رزانتي في كلامي،
وحداكتي تبان
من صنعت إيدي لي قدامي.
إلى شفتيني
بلى ما تسقسي عليا
من شوفتك ليا
تعرفني عبدية
جدوري عبدية
و اغصاني مسفوية
ماشي متكبرة
و لا مغرورة
لكن حبي لبلادي
حيث أنا فيها
مالي مظلومة
ما لي مقهورة
وخا نقول أنا مسفوية
ما نسى المراة المغربية
سوا كانت دكالية
او لا كازاوية،
صحراوية
او لا شمالية،
لا حوزية
اولا رباطية،
فاسية
ولا صويرية،
او لا مولاتهم السوسية
المهم مغربية
عندها قيمة و مزية.
لكن إلى شفتيني
بلا ما تسقسي عليا
غير من شوفتك ليا
تعرفني عبدية،
مسفوية،
وإلى شفتي أكثر
و سمعتي ليا
غادي تعرفني سبتاوية
بنت سبتاوي و سبتاوية
بلادي..
بلاد القطبان المشوية
و الخضرة الطرية
بلاد الكرم و الضيافة
لي جا ليها يتعافى.
بغيتي تجي ؟
سول عليا
او لا ما لقيتي جواب؟
جي غادي تلقى ليك مفتوحة ايديا،
ب تربيعة زينة
قدامي براد ،لكيسان و الصينية


نرجو لكم زيارة سعيدة لمدينتنا و منطقتنا








1.أرسلت من قبل mohamedsalka1984@gmail.com في 05/09/2010 23:23



كلام رائع يدخل القلب دون استئذان لحلاوته وسهولة الفاظه




مرحبا بك صديقتنا وبما اتيتنا بهِ ننتظر مزيدك بشغف

علنا نرتوي بشيء من ينابيع جبال سوس المعروفة بنقائها وصفائها ونسائها المناضلات

بداية موفقة أتمنى لك التوفيق شكراً لهذه المحاولة التي أرجو لها الإستمرار والنجاح

تقديري أخوك محمد سالكة

2.أرسلت من قبل عبد الحميد جبَان في 06/09/2010 02:20
كان الله في عون اللغة العربية الفصحى
إن البغاث في أرضنا يستنسر

3.أرسلت من قبل كاني في 09/09/2010 08:01
ا السي عبد الحميد ولا بد الزكيطات ،
بهاد المنطق انت ما عندطش الارض . سير لعربان الشرق اسكن ، وبترتكت عليك من التخلف ...

هانيا الشرامي
شكرا على المضمون
أزول أقوى من عربان

4.أرسلت من قبل عبد الحق في 09/09/2010 14:25

اشكون نتي واشكزن تكوني

5.أرسلت من قبل rihab في 14/09/2010 19:46
slt haniya merci 3la had ma9ati3 mtmayza bi hokm anni 3raft 3lach ktabti had khatira hatta law annani wajdto bad tofayliyin alladin lam yafhamo macha3arti bih hin kitabat dalik o3dorini lam atamakan min kitaba laki bi horof arabiya
tahiyati
rihab


في نفس الركن
< >

الجمعة 13 أبريل 2018 - 16:28 بعيدا عن السياسة